DSCF9498

Dumani  hè l'ascinsioni. l'Ascinsioni hè una festa chi ha sempri avutu monda impurtanza in a me famidda.  U ghjovi di l’Ascinsioni, si devi andà à piddà l'arba di l'ascinsioni innanzi ch’iddu si pisessi u soli e si metti in casa pà pruteghja a famidda.Si trova st'arba abbastanza facilmenti annant'à i cantona è ancu à u bordu di a strada.

  Si dici chi si ùn fiurisci micca hè cattivu segnu (quist’annu hè ghjà fiurita).  Si dici ancu chi s’idda fiurisci à l’insù hè bon segnu e s’idda fiurisci à l’inghjò hè cattivu segnu . 

C’hè ancu l’ ovu chi si devi piddà stu ghjornu , chi si devi tena un annu è chi ùn ammarcisci micca. Servi à pruteghja a casa, supratuttu da u focu è da a saetta. Si l'ovu si sciappa si dici chi accaddarà una disgrazia in a famidda.

In i me loca piddemu ancu a prima acqua innanzi u pisà di u soli e u casgiu fattu stu ghjornu

L'arba, l'ovu è u casgiu  poni serva pà fà l’arazioni (prigheri pà guariscia).

 

In a me famidda rispittemu sti tradizioni parchi facini  parti di a noscia manera d'essa è di campà.

.

DSCF9497